PLANTILLA

PROGRAMA

Gau jaia programan, Ópera Omniak Juan Francés de Iribarren nafarraren, Diego Pérez de Camino errioxarraren eta Gasteizko Santa Mariaren Kolegiatan kapera maisu izan zen Miguel de Irízarren bilantziko eta kantuak entzuteko aukera emango digu. Lizarrako eta Logroñoko Antzinako Musikaren Asteekin lankidetzan, generoen fusio ausarta eta antzerki, dantza eta musikaren nahasketa paregabea dakarkigu, ikuskizun zoragarri baten baitan. Bilantziko hauen estetika, poesia eta musika zuzenean datoz antzerki herrikoitik, bere tonadilla eta seguidilla bereizgarriak tarteko. Hala, bizitasun handiz nahasten dira askotariko estiloak, besteak beste estilo tradizional hispaniarra, dantza herrikoia eta estilo dotore berria.

ARTISTAK

Opera Omniak Juan Francés de Iribarrenen (1699 – 1767) lan ugari estreinatu ditu garaiotan Granadako Musika eta Dantzaren Nazioarteko Jaialdian eta Madrilgo Hiribilduko Udak jaialdiaren barruan. Juan Francés de Iribarren, hain zuzen ere, Malagako Katedraleko kapera maisua izan zen XVIII. mendean. Era berean, Santo Domingo de la Calzadako katedralean Diego Pérez de Caminoren (1740 inguru -1796) bilantziko eta kantuak estreinatu zituen. Azken hori Katedral horretako kapera maisua izan zen. Hiri horretako Udalak eta Kabildoak, programaren arrakasta ikusirik, musika horren disko bat grabatzeko eskatu zioten taldeari. Hala, De su Historia izenburupean, Santo Domingo de la Calzadari eta haren mirari eta balentriei eskainitako bederatzi kantu eta bilantzikoz osatutako lan zoragarria egin zuten. Horretarako, Opera Omniak Raúl Angulo musikologoaren eta Ars Hispanaren laguntza izan zuen, programa eta aholkularitza musikologikoa garatzeko.

Espainiako ondare musikal oparoarekin konprometitutako taldea da Opera Omnia, eta, beraz, horri guztiari hautsa kendu nahi dio, berriz ere egin dezan distira, beste garai batzuetan egin zuen bezala.

Isaac M. Pulet (biolina eta zuzendaritza)

Vigoko Musikako Goi Mailako Kontserbatorioan biolin barrokoaren irakaslea den honek Madrilgo Musikako Goi Mailako Errege Kontserbatorioan hasi zuen prestakuntza, Hiro Kurosaki nazioarteko biolin jotzailearekin batera, bai eta Koninklijk Conservatorium Den Haag-en ere (La Haya Errege Kontserbatorioa, Herbehereak), Pavlo Beznosiuk eta Ryo Terakadorekin batera. Halaber, Lucy van Dael, Anton Steck, Mira Glodeanu, Margaret Foultness, edo Kati Debretzeni bezalako maisu-maistren masterclass-ak jaso zituen.

Espainian, lankidetzan aritu da La Madrileña, Nereydas, La Capilla Real de Madrid, Hippocampus, La Ritirata, Conductus ensemble, Contrasto armonico, La Spagna edo Harmonia del Parnás bezalakoekin. Horiekin hainbat lan grabatu ditu Panclassics, Arsis edo Brilliant Classics bezalako diskoetxeetan. Nabarmentzekoa da Música Alchemicarekin izandako lankidetza. Azken hori Lina Tur Bonet solista apartak zuzentzen du, eta, harekin, oraintsu grabatu ditu bi disko, Antonio Vivaldiren musika argitaratu gabeez osatuta: Vivaldi premieres eta Il Grosso Mogul. Lan horiek kritika ezin hobea jaso dute.

Antzerkiaren munduan, lankidetzan aritu da Antzerki Klasikoko Konpainia Nazionalarekin. Harekin batera jo zuen, hain zuzen ere, El trino del diablo (Tartini), Sevillako La Estrellan, Eduardo Vascok zuzenduta. Espainiako antzinako musikan aditua izanik, musika egokitzen eta zuzentzen lan egiten du Nuria Alkortak gidatzen duen antzerki taldean. Talde horrek Goethe Calderón de la Barca dramaturgo espainiar ospetsuaren lanak jorratzen ditu. Hala, musika berreskuratzeko eta musikologia lantzeko lan handia egin dute, besteak beste honako hauetan: Año Santo en Madrid, Theatrum mundi, Darlo todo y no dar nada edo Hado y divisa

Aktore-musikari honek Yllana Producciones eta Ara Malikianen Pagagnini umore ikuskizunean parte hartu du. Harekin batera, planeta osoko antzokirik onenetan aritu da eta, gaur egun, beste ikuskizun bat sortzen ari da, umorea eta musika uztartuz: Pagagnini 2.

Sarrerak