Aurkezpena - ama-sma

CAB presentación EUS

Aurkezpena

Presentación Semana Música antigua EUS

Azken hamarkadetako iragan hurbilean pentsatuz hitz egiten dugu maiz memoria historikoaz. Iraganeko soinu eta oihartzunak, ordea, aberatsagoak eta poliedrikoagoak dira oraindik gaur egunera arte iristen diren musika historikoen arrasto luzean pentsatzen badugu. Arabako Antzinako Musika Astea 1982an sortu zen, antzinako musika iraganeko kontua soilik izan ez dadin. Arabako Lurralde Historikoaren ingurune liluragarria nazioarteko figura garrantzitsuenen musika historikoen inguruko aurkikuntza, topaketa eta gozamenerako lekua izan da 39 urte hauetan. Eta 2020an, urte berezi bezain nahasia bera, iraganeko aztarnekin kontaktu bizia edukitzeak begiak lurzorutik kentzea erraztu zigun, nor garen ikuspegi zabal baten bila.

12 KONTZERTU 2021EAN

2021ean, Arabako Antzinako Musika Astearen 39. ekitaldiak 10 kontzertu eskainiko ditu irailaren 4tik 11ra bitartean. La Petite Ecurie haize taldearen soinuak Probintzia Plazan zabalduko dira, El Barroquista dibulgatzaileak iragarrita; Gorbeiako Sarriko Parketxean ere entzungo dira, naturaz gozatzeko aukera ematen duen ekitaldi batean. Bakarlari eta talde ospetsuak izango dira gurean, hala nola Raquel Andueza sopranoa (Gebaratarren dorre-jauregia), La Ritirata (Kontserbatorioko Auditorioa) edo Cantoria (Erregeen Andra Maria eliza, Guardia). Lizarrako eta Logroñoko Asteekin lankidetzan, Omnia operak musika profanoa ekarriko digu Santa Maria katedralera, besteak beste, bertako kapera maisu izandako Miguel de Irízarren musika. Artefactum-en Erdi Aroko musikak ardoaren gorespenak abestuko ditu Baigorri upategi bikainean.

Crossover nota Antonio Serrano nazioarteko izarraren eskutik eta aho soinutik iritsiko da, Bach y "Bach" proiektuarekin eta Daniel Oyarzabal eta Pablo Martin Caminero gasteiztarrek lagunduta. BREZZA ensemble gaztearen talentu liluragarria entzungo da Santa Maria Katedralean. Ustekabeko altxorrak ere aurkituko ditugu, esaterako Done Bikendi Martiriaren elizako habe basoa Fran Lópezen tiorbarekin; baita izarrei begiratzeko aukera ere, esferen harmonia ikusteko Gatzaga Buradongo dorre-jauregian, Javier Armentia eta Joaquín Sevillarekin.

+ ASTEA

Hamar kontzertu horien inguruan, lehen aldiz, eskaintza zabala sortu dugu, +ASTEA izeneko beste 11 musika jarduerarekin. Jaialdiaren asmo soziala sendotzeko, gure musika Gasteizko adinekoen bi egoitzatara eramango dugu. Arnasketa eta ahots lantegia eskainiko dugu Raquel Andueza sopranoarekin, COVID iraunkorra duten pazienteentzat saio berezi batekin. Jesús Guridi Kontserbatorioko ikasleek La Ritirata taldeko musika aholkuez gozatuko dute. Cantoría ahots taldeak beraiekin kantatzera gonbidatuko gaitu saio parte hartzaile batean. Luis XIV.aren gorteko musika bizitzaren inguruko zine musikaleko ziklo bat egingo dugu. Ignacio Aldecoa Kultura Etxeko liburutegian, musika historikoei buruzko informazio gune interesgarria izango dugu.